煮食實驗- 青咖喱雞髀

我諗大家睇張相都絕對估唔到佢係青咖喱

之前去泰國買咗好多包青咖喱醬

已經煮左無數咁多次青咖喱

其實都食厭

頭先喺度諗點解唔將青咖喱醬搽落雞髀到然後拎去焗？

就嗱嗱臨走啦去超市買返一pack雞髀返嚟

於是咁樣就決定試吓咁樣煮睇吓好唔好食

煮法都好簡單

材料

泰國青咖喱

急凍雞髀

胡椒

鹽

雞粉

材料好簡單做法就更加簡單

做法

先將雞髀按摩下

然後係背面沿住雞骨位剪開

然後將青咖喱醬 胡椒 鹽 雞粉搽上雞髀嘅背面同正面

醃大約一個鐘

然後

放入電飯煲度較quick cook焗至中途反面可焗至跳制

再焗五分鐘

食得！

係咪好簡單先！

味道都唔錯架

好香青咖喱味嫁

懶人煮意- 冬陰公雞髀

今夜想食重口味幾次就準備咗冬陰公雞脾

冬陰公sauce加少許雞粉醃足一晚拎去電飯煲焗熟就食得

So easy 

懶人煮意- 什錦字母粉

我今夜飽飽地 想食簡單d輕盈d

終是又煮個粒粒字母粉

貪佢夠輕鬆夠快手

材料 大家一眼睇哂...

火腿

字母粉

豬肉

粟米

蜆肉

做法

將字母粉放落滾水中煮至淋身

隔水

將豬肉炒碎

加入少許豉油 雞粉 米酒 盬調味

加入火腿蜆肉炒出香味

倒入字母粉

滾後熄火加入粟米粒

搞掂

其實屋企有啲乜嘢都可以落

仲可以順便當清雪櫃添！

而且有時候大魚大肉食得多食返一餐今晚清清地都幾好架

我食嘅時候貪得意張少少韓國紫菜落去

幾搞笑

雖然佢好簡單但係字母粉絕對係我嘅comfort food!：D

快手小食之選 輕盈三文魚頭盤

通常食三文魚都係點豉油同Wasabi

今次整西餐 仲無可能又係豉油同Wasabi嘛

於是就整左呢個頭盤 其實簡單到係將佢組合起黎(-_-)

材料

三文魚刺身

檸檬

洋蔥

做法

先將洋蔥切粒

浸涷滾水3分鐘先走部分辣味

三文魚刺身上放適量洋蔥

再淋上適量檸檬

係唔係真係簡單到冇人有先！？

不過老實講

唔使下下食到豉油version 既三文魚 可以轉換下口味 都唔錯啊！

而且平時食三文魚食幾塊就開始覺得好油

反而用洋蔥同檸檬汁可以將油膩感帶走

食起上嚟就更加輕盈！(u_u)

而且口感都唔錯架

有洋蔥既脆同三文魚既淋互相交替！

如果閣下係食得辣嘅 洋蔥甚至可以唔需要浸涷水！

諗到自己5分鐘都唔使就預備好一個頭盤

我就好想呵呵聲笑

甘無技巧既頭盤都俾我諗到～_～

Proud of myself(((o(*ﾟ▽ﾟ*)o)))

重口味-五香肉丁炆薯仔

大家有無成日覺得五香肉丁一罐好少份量呢？

唔好講笑 我覺得佢攞嚟畀我做零食啦都唔夠/-\

而且依家一罐罐頭都好鬼貴

增量好緊要嫁！

於是就整咗五香肉丁炆薯仔

貪薯仔夠平嘛！

材料

薯仔 3個

五香肉丁 

蒜頭 少量

豉油 少量

做法

薯仔洗乾淨之後

削皮

滾刀切粒

蒜頭切碎

先用五香肉丁嘅油爆香蒜頭

加入薯仔

加一半水及少量豉油

擒蓋炆6分鐘

加入五香肉丁

炆2分鐘

Done

做法係唔係好簡單先！？

老實講五香肉丁真係好多油🙈

我見到都怕怕地

不過好好撈飯啊！

連不太愛食薯仔既我都大愛

少小辣既味道很好送飯呢！

小小既肉丁一煮就變1碗餸

抵！

懶人晚餐 粟米字母粉

759特價既時間我買咗一包字母粉

其實我細個好鍾意食字母粉 貪佢細細粒好得意

今晚唔太有精神就快手煮個粟米字母粉

材料

火腿

粟米

蜆肉

蒜頭

字母粉

豬肉碎

蝦仁

金寶粟米火腿湯

做法

先煲滾水 將字母粉加入 落小小鹽同橄欖油

煮7分鐘左右 

拎起

將其他材料切粒粒

爆香豬肉碎 同蒜頭

加其他材料一齊炒出味

倒入粟米湯

加水

滾時加入字母粉

食得！

雖然睇落去啲材料好似好多咁

不過其實全部都係屋企嘅剩貨 ：D

而且切粒粒感覺上1塊火腿都會變好多火腿架！

不過好可惜

我只係落咗半包細嘅字母粉

Omg

點知佢着出嚟之後係四人份=0=

夏日透心涼-麻醬青瓜雞絲

夏日炎炎 

又無胃口

食涼浸浸嘅嘢就最好架啦

就試吓整個麻醬青瓜雞絲啦！

 材料

 青瓜

雪藏雞脾肉

鹽

姜

麻醬

豉油

做法

雞肉用少少鹽同油醃

先將青瓜切條

放入雪櫃

煲滾水然後落姜

雞髀落水

煮5分鐘熄火焗15分鐘等雞肉自己慢慢煮

用手將雞肉撕成絲狀

攤凍放入雪櫃

將雞肉同青瓜撈埋一齊

麻將同埋豉油調味

食得

用姜可以踢走雪味

我習慣將雞肉煮一陣就熄火用餘溫焗熟佢

咁樣食啲繼續就可以保持嫩口

隔夜菜大翻身之鴨絲香菇粥

前日買咗燒鴨返嚟食剩好多

又有小小飯剩

點算好呢？

煮粥就最好啦！

材料

燒鴨

冬菇

冷飯

瑤柱

雞粉 

鹽

做法

冬菇同瑤柱浸過夜

先將少少油爆香冬菇同瑤柱

然後加入冷飯

加熱水煲到開花

再將燒鴨切絲

加適量雞粉 鹽調味

係唔係好簡單先！？

我覺得好食過平時街邊食嘅皮蛋瘦肉粥或者係艇仔粥！

有冬菇香味又有燒鴨個咸味！

They truly are perfect match!!!

我用冷飯煮 咁樣可以慳返多啲時間而且啲粥食落去都比平時嘅綿好多

生活之趣 - 雙飛人藥水

雙飛人藥水可以話係陪到我大

我細個好小用無比滴 白花油等等

因為有啲咩事我都係用雙飛人

細細個我肚痛媽咪就會將雙飛人滴落水都比我飲

俾蚊咬又會滴落痕嗰個位

傷風感冒有時都係飲雙飛人

本身都唔覺得D咩大不了

但係聽到人哋又要買白花油無比滴好多款嘅時候我覺得都幾好彩有雙飛人

近排天氣又熱又悶

除咗成日流汗

我又會將啲水噴落自己度

然後就返房繼續做低頭族

唔知係唔係up住

條頸突然間好痕

一r就開始起粒粒

嚇到我爆炸

尤其是一沖涼沖完涼條頸痕到不得了

最初都有D擔心係濕疹

後期諗諗吓應該係生熱痱

本身有諗住用一條醫學牌子嘅萬用膏

但係搽咗反而覺得仲唔舒服

我突然間醒起我第一日好痕嘅時候查咗雙飛人跟住就好返dd

於是我就繼續用落去

估唔到一查咗一陣之後就唔太痕

不過前提係唔可以做低頭族😂

雙飛人藥水你係得嘅👏👏👏

一餸走天下- 日式薯仔炆肉丸

有時候夜晚要食啲乜嘢都覺得好麻煩

最好就係一個餸就搞掂啦

日式薯仔炆肉丸絕對可以幫到我

又簡單又快捷又好味😜

材料

薯仔2個

絞肉 8隻

面包

洋蔥 半個

豉油 適量

味醂 適量

冰糖 適量

做法

需要嘅材料就係咁少

首先將面包浸水

分開細細舊

再將佢mix with 肉丸 加蛋

有心機就撻下佢

無心機就求其撈勻佢😂

然後將薯仔削皮

在切成一塊塊

薯仔唔需要切到好細塊 一塊薯仔大約有四份一個手掌咁大啦

跟住開火落牛油

慢火煎香肉丸

加入洋蔥

炒出香味

再可以加入薯仔 

炒到每塊薯仔都可以沾到油份

然後就可以加入豉油 糖 味醂

再加入水 水位係材料既四分三

蓋上慢火煮至收汁

好味嘅日式薯仔炆肉丸就完成

Tips 

糖唔一定要落冰糖 屋企冇冰糖可以落砂糖甚至係黃糖 不過我發現冰糖好似煮完出嚟感覺好似令D

鍾意食洋蔥或者係紅蘿蔔嘅可以加埋洋蔥同紅蘿蔔添

肉丸加麵包可以令到個肉丸更加鬆軟 唔一定要加麵包 甚至可以加麥皮 豆腐 餅乾都可以架

我有D衝動想試吓加麥皮下次加左再話比大家知😁

感覺甜甜地真係好好送飯😚

肉丸又啖啖肉 薯仔仲可以炆都好入味

一個餸有菜又有肉完全滿足晒我所有願望啦😉😉

Vege. Night - 蕃茄天使面

雖然我係一個無肉不歡既人

又係一個唔鍾意食酸野既人

如果我平時整意大利粉通常都一定係白汁加雞肉

不過今晚突然間好想食得輕盈

見屋企有幾個整沙律剩既番茄

於是整咗一個芝士番茄天使麵

材料

蕃茄 3個

番茄醬 

天使麵 

牛油

橄欖油

蒜頭

鹽

糖

黑胡椒

Parmesan cheese

做法

先將蕃茄切粒

然後蒜頭同牛油同橄欖油一齊炒香

加入切粒蕃茄

炒香再加入番茄醬

煮成蓉

另外

滾水煮天使麵 4分鐘

將天使麵加入蕃茄醬汁中煮

再加上Parmesan cheese

加入適量嘅鹽 糖 黑胡椒 調味

食前可用Parmesan cheese & herbs 裝飾

我覺得與其食天使麵我比較熱愛蝴蝶粉 口感上比較好

我成日都覺得天使麵嘅質感有啲似傳統蛋面

始終新鮮蕃茄都係做唔到番茄醬嘅味道 所以我最後都加入番茄醬 令味道更豐富

本身想只係落牛油爆香蒜頭, 不過擔心好易燶又想light少少, 於是就落一半牛油一半橄欖油, 如果你想再健康少少甚至全部落橄欖油都冇問題架！

雖然冇落到肉 不過有芝士又有牛油 食完都仲覺得好邪惡啊！

一餸走天下- 金菇肥牛卷

你鍾唔鍾意有汁既餸？

如果 得一碟餸係我面前

而佢又有汁

我會毫不猶豫咁令到每一粒飯粒都包住汁既味道

牛汁對我而言係世上最美妙既

本身想整吉野家牛肉飯

後來怕得牛肉同洋蔥會好heavy

於是就整咗金菇肥牛卷

有金菇感覺上健康啲 (我最叻自欺欺人...)

材料

肥牛片

金菇 2包

蠔油 適量

豉油 適量

辣椒 少許

糖 少許

做法

肥牛先解凍

然後將金菇洗完分成一束束

卷起

大火先煎埋口位定型

然後轉邊煎

落蠔油 豉油 糖 加少少水 

大火煮至收汁

最後加少少辣椒絲裝飾

食得！

又係另一個快手餸

卷起金菇可能已經係最嘥時間既步驟

味道都係隨自己口味調 我鍾意甜甜地所以加左少少糖

今次買啲肥牛比較薄同短 所以 金菇肥牛卷都用左兩至三塊肥牛

我相信呢一味餸大人細路都鍾意食

建議金菇肥牛卷唔好煮太耐 如果唔係裏面嘅金菇會難咬嫁！

剪咗埋後埋口先可以方便定型

呢個餸可以厄着自己又有肉又有菜 唔錯唔錯！

食泰多之旅

去左五日泰國

食左好多野

其實我覺得反而街邊既嘢會好食過店鋪既

話說泰國嘅七仔d 叮叮真係好吸引人又好好食

點解香港嘅就唔可以效法下？T____T

仲有佢嘅公仔麵都好好食 好有泰國風味！

話說啲人話去泰國一定要飲泰式奶茶

我去到第四日先至醒覺到好想飲泰式奶茶

點知過程就一波三折

首先第一次要泰式奶茶佢居然比左杯仙草凍我

第二次去到另一家 佢比左台式奶茶我

然後去到呢一間終於見到有泰式奶茶

點知...

甜到喊出聲

完全係飲咗¼就飲唔落

我一路飲一路喺度諗泰國人係唔係個個都有糖尿病？

我都已經算係好食得甜 點知飲佢呢杯泰式奶茶都覺得頂唔順

然後去到第五日我去咗另一家食河粉嘅

又見到泰式奶茶

價錢仲要平一半

梗係即刻叫拉

咦！

甘好飲既！；0

我講唔出佢同港式奶茶有咩分別

嗰陣甜味係有少少唔一樣

然後我默默咁樣好快將一杯野飲清哂

呢個就係我頭先第一杯好難飲嘅泰式奶茶個間鋪拉！

專系食甜品！

我諗係女仔見到佢哋都會發晒癲

雖然佢只不過係雪糕加朱古力醬再加少少生果 

因為係新地啊！

搞到我連續食咗兩日

第一日我仲蠢左

睇唔到佢出面原來有好多款雪糕可以揀

於是就揀咗個普通嘅朱古力

仲有最新出嘅好似係芒果

超級超級超級好食

大家如果係嘅就記住叫拉！

杯嘢飲係喺一個夜市度買嘅

佢一杯超大杯都係＄10港紙

有乜理由唔買！

尤其是係

係咁熱嘅情況下面

＄10一杯冰水都抵啦！

我叫左嘅係fruit punch

味道都唔錯唔會太藥水

去到第五日先至諗起

原來咁耐以來都冇食個河粉

於是就走左去試

味道唔差不過又唔係好understanding 

係傳說中嘅椰子雪糕

係central world 附近嘅一個夜市仔買嘅

排咗一陣間先至有

個椰子味好香

上面仲有花生 小小糖調味

下面有少少椰肉

天時暑熱食佢真係透心涼 又得意

係Central world 上面個food court 食既

難食...

無咩青咖喱味...

我覺得七仔嘅好食好多！

其實我發現我自己唔太鍾意食donut 

我成日都覺得好似食緊甜嘅油炸鬼

麻麻地

但係唔知點解都係買左兩次...

頭先嘅全部都係係曼谷食既

呢啲就係係芭提雅叫嘅

係我酒店附近有個夜市

我就叫左呢個冬陰公湯

壞處係好甜 雖然我自己唔鍾意食酸野

但係一個冬陰公如果係甜嘅對我來講好唔合理

好處係足料 仲有我鍾意食嘅粉絲

呢個好抵呀

我連續食咗兩日^_^

係香港買至少都要30幾蚊

喺嗰度買到只不過係15蚊咋

其實仲有好多嘢食我冇影到相嫁

去成個泰國我唯一記得嘅就係食食同埋食omg!

例如話最好食嘅應該係

水門市場附近有間粉紅色嘅食海南雞飯嘅

相信有好多人都推介

我都覺得好好食

而且價錢好平

仲有一碗雞湯送

因為我酒店係海南雞飯兩分鐘嘅路程

所以我都連續食咗兩日

我通常都會係粉色衫嘅海南雞飯都買咗海南雞飯

然後再過去隔離綠色衫嘅買沙嗲串燒 (佢啲串燒好似都係1蚊到一串)

重點係佢嘅沙嗲汁

好香濃嘅花生味

而且芭提雅嘅四方水上市場嘅芒果

都超級好食

佢係我咁大個女以來食過最甜嘅芒果

雖然佢入場費要俾錢

不過我覺得食到佢個芒果都抵反哂！

不過相反我係big c都買咗個芒果

好酸

所以我都係相信一啲細鋪頭食嘢嘅質素可能會好過大鋪

泰國夜市嘅燒烤都好平

細串嘅可能一蚊港紙就有一串

大串既嘅可能就要幾蚊港紙

味道都好唔錯嫁！

不過我係芭提雅嘅一個夜市都食過燒蝦

Um.....

佢真係無調味只係得燒烤味><

肉質都好差吓

咁樣都仲要收我100泰銖

都幾唔抵

新嘅水門市場個mall有我好中意食既熱狗捧 (其實都唔知做叫咩名)

以前成日都係Aia嘉年華會食過

KFC有個冬陰公雞扒都唔差啊！

雖然佢嘅炸雞扒同香港嘅差唔多

不過佢個冬陰公味好強

泰國啲嘢飲好多款仲好平

不過大部份嘅都偏甜:(

好有名既椰青我試過飲過一間好清甜 但係另一家又發現有啲酸味 所以我覺得有啲似睇彩數

真心佢啲公仔面真係好好食尤其是系青咖喱味

嗰幾日我第一餐幾乎係食青咖喱公仔面

我覺得佢個汁甚至好食個我係餐廳度食嘅

佢好食到我最後買咗十幾包公仔麵返嚟香港

其實我覺得去旅行冇話特定一定要去邊個地方食同玩

自己咩都試下其實仲刺激仲有趣嫁！

一諗起泰國我就好想去按摩啊！

又平人舒服

按摩足一個鐘先50港紙

係唔係勁平先！

我覺得成個泰國旅程最幸福嘅都莫過於係按摩

每一次按完都覺得成身舒服晒

尤其是佢基本上度度都有好多間按摩店

我無搵定邊間

只係行過

見到環境唔錯就入去啦！

男技師同女技師我都有按過

我個人覺得男嘅比較溫柔

今次分享到呢度啦

Thanks for reading such a long article ~_~